Россия ҳудудида хорижликлар иштирокида содир бўлган йўл-транспорт ҳодисалари бўйича 2025 йил январ–сентябр ойлари учун статистик маълумотлар эълон қилинди.
Россия Ички ишлар вазирлигининг Йўл ҳаракати хавфсизлиги илмий маркази маълумотларига кўра, мазкур даврда Ўзбекистон фуқаролари иштирокида 827 та йўл-транспорт ҳодисаси қайд этилган. Бу ўтган йилнинг шу даврига нисбатан 18 фоизга кам кўрсаткични ташкил этади.
Шу билан бирга, Ўзбекистон фуқаролари бахтсиз ҳодисаларда айбдорлик даражаси бўйича 65 фоизлик кўрсаткич билан иккинчи ўринда қайд этилган.
Рейтингда Тожикистон фуқаролари биринчи ўринда туриб, улар иштирокидаги 666 та ҳодисанинг 67 фоизида ҳайдовчи хатоси сабаб бўлган.
Арманистон ва Озарбайжон фуқаролари 64 фоизли натижа билан учинчи ўринда қайд этилган.
Энг паст кўрсаткич эса Белоруссия ҳайдовчиларида — 50 фоиз.
Шунингдек, Қозоғистон фуқаролари 128 та ЙТҲ билан энг паст кўрсаткични қайд этган, бу ўтган йилга нисбатан 21 фоизга камайганини билдиради.
Таҳлилчиларга кўра, ўзбекистонлик ҳайдовчилар ўртасида ЙТҲлар сонининг камайиши ҳайдовчиларнинг транспорт маданияти ошиб бораётганидан далолат беради.