Рус элчиси Москванинг Украинага нисбатан ядро қуроли ишлатишини рад этди
У, шунингдек, тактик қуроллар қандай ҳолатда қўлланишини айтиб ўтган.
Москва Украинадаги ҳарбий можарода ядро қуролларидан фойдаланмайди. Бу ҳақда Россиянинг Буюк Британиядаги элчиси Андрей Келин “BBC” телеканалига берган интервьюсида маълум қилди.
Унинг айтишича, тактик қуроллар Украинадаги каби можароларда қўлланилмайди. Бу ҳарбий доктринада белгилаб қўйилган. Мамлакат хавфсизлигига таҳдид бўлган тақдирдагина ядро қуроллар ишлатилиши мумкин.
“Бунинг (ядро қуролларининг) ҳозирги операцияга алоқаси йўқ”, — деган элчи.
Телеканал маълумотларига кўра, Россияда тахминан 2000 га яқин тактик ядро қуроллари мавжуд. Улар нисбатан қисқа масофаларда қўлланилиши мумкин. Ушбу туркумга жанг майдонида ишлатиладиган кичикроқ бомбалар ва ракеталар киради.
