Уфада Ўзбекистон фуқароси дарёда чўкиб кетди
У чўмилиш тақиқланган ҳудудда кучли оқимни енга олмаган.
Россиянинг Уфа шаҳрида Ўзбекистон фуқароси Белая дарёсида чўкиб кетди. Ҳодиса “Каменная переправи” ҳудудидаги кўприк остида, чўмилиш хавфли деб белгиланган жойда содир бўлган.
Маҳаллий маълумотларга кўра, эркак жазирама туфайли чўмилмоқчи бўлган, бироқ кучли оқимни енга олмай сувга чўккан.
Уфа Фуқаролик муҳофазаси бошқармаси маълумотига кўра, 22–28 июль кунлари қутқарувчилар 87 кишига, жумладан, 33 нафар болага ёрдам кўрсатган. Белая дарёсидаги “Солнечний” пляжида эса 74 киши қутқариб қолинган.
Қайд этилишича, ўтган йил давомида сувдан жами 30 киши, жумладан саккиз нафар бола қутқарилган. Бу эса жорий йилнинг июль ойидаги бир ҳафтада қутқарилганлар сони ўтган ёзги мавсумдаги кўрсаткичдан қарийб уч баравар кўп эканини англатади.
Мутахассислар буни ҳаво ҳароратининг юқорилиги ва Белая ҳамда Уфа дарёларида сув сатҳининг баландлиги билан изоҳламоқда. Уларнинг таъкидлашича, кучли оқим сақланиб қолаётгани сабабли шаҳарда дарёларда чўмилиш тақиқи ҳамон амал қилмоқда. Аҳолига дарёлар ўрнига кўлларда чўмилиш тавсия этилган.
