Ҳусийлар Саудия Арабистонига Ироқ ҳудудидан ҳужум қилгани айтилмоқда

Ямандаги ҳусийлар Саудия Арабистонига уюштирилган сўнгги ҳужумларнинг бир қисмини Ироқ ҳудудидан туриб амалга оширгани айтилмоқда. 

 

Минтақадаги икки расмийнинг Reuters'га билдиришича, ҳусийлар жорий ҳафта Саудия Арабистонининг шарқий вилоятидаги нефть объектларига Ироқ ҳудудидан зарба берган. Уларнинг таъкидлашича, айрим ҳужумлар Ироқдаги Эронга яқин қуролли гуруҳлар билан биргаликда ва Эрон Ислом инқилоби қўриқчилари корпуси (ИИҚК) назорати остида амалга оширилган.

 

Қайд этилишича, бу ҳолат Эрон бошчилигидаги "Қаршилик ўқи" таркибидаги гуруҳлар ўртасидаги ҳамкорлик кучайганини кўрсатади. Таҳлилчиларга кўра, Сурияда Башар Асад ҳокимиятининг қулаши ва Ливанда Ҳизбуллоҳнинг заифлашиши ортидан Ироқ ушбу иттифоқ учун муҳим таянч ҳудудга айланмоқда.

 

Саудия Арабистони чоршанба куни АҚШ билан биргаликда Ироқдаги ҳужумларга алоқадор деб ҳисобланган объектларга ҳаво зарбалари берди. Риёд расмий равишда ҳужумлар учун Эронга яқин Ироқ қуролли гуруҳларини айблади. Ҳусийлар эса зарбаларни ўзлари амалга оширганини маълум қилган. Ироқ ҳукумати воқеа юзасидан тергов олиб бораётганини билдирган.

 

Саудия Арабистони, Эрон ва Ироқ ҳукуматлари ҳамда ҳусийлар Реутерсънинг изоҳ сўровига жавоб бермади. Ҳусийлар ҳужумларни Ямандаги Саудия амалиётларига жавоб ва қироллик томонидан жорий этилганини даъво қилаётган "қамал"ни бузишга қаратилганини билдирган. Риёд эса бундай қамал мавжудлигини рад этмоқда.

 

Ҳусийлар ва Эронга яқин Ироқ қуролли гуруҳлари ўртасидаги ҳамкорлик аввалдан мавжуд бўлиб, 2024 йилда томонлар Исроилга қарши илк қўшма операциясини ҳам эълон қилган эди. Таҳлилчиларга кўра, Ироқнинг кенг ҳудуди ва Саудия Арабистони билан 800 километрдан ортиқ чегараси бундай ҳужумларни амалга ошириш учун қулай шароит яратмоқда.

 

Шунингдек, Ироқ бош вазири Али аз-Зайди Саудия Арабистонига режалаштирилган ташрифини бекор қилган. У сентябрь ойи охиригача мамлакатдаги барча қуролли тузилмаларни давлат назоратига олиш режасини илгари сурмоқда.