Ўзбекистон, Қирғизистон ва Озарбайжон Биринчи хонимлари “Альтин балалик” реабилитация марказига ташриф буюрди
Ташриф якунида Қирғиз Республикаси Биринчи хоними Зироат Мирзиёевага анъанавий қирғиз миллий мусиқа асбоби — чангқўбизни совға қилди.
Ўзбекистон Биринчи хоними Зироат Мирзиёева Қирғизистон Биринчи хоними Айгул Жапарова ҳамда Озарбайжон Биринчи хоними Меҳрибон Алиева билан биргаликда Қирғизистондаги “Альтин балалик” реабилитация марказига ташриф буюрди.
Ташриф давомида олий мартабали меҳмонлар марказ фаолияти, болалар учун яратилган шароитлар ҳамда ташкил этилган маҳорат дарслари билан танишиб, тарбияланувчилар билан мулоқот қилдилар.
Меҳмонлар шарафига «Шаттик» миллий рақс ансамбли ва ёш комузчилар жамоаси томонидан маданий дастур намойиш этилди. Шунингдек, «Ақилман» иқтидорли болалар президент лицейи тарбияланувчилари томонидан лой ва кигиздан тайёрланган ижодий буюмлар кўргазмаси ташкил этилди.
Дастур доирасида Биринчи хонимлар марказнинг соҳил ҳудуди ҳамда санъат галереясини ҳам кўздан кечирдилар. Галереяда Қирғизистонда ўтказиладиган болалар ижодиёти бўйича халқаро танловлар ғолиблари, жумладан, ўзбекистонлик ёш рассомларнинг ижод намуналари намойиш этилди.
Ташриф давомида Ўзбекистон, Қирғизистон ва Озарбайжон халқлари ўртасидаги дўстлик рамзи сифатида яратилган “Дўстлик дарахти” номли кигиз панносига якуний безак элементи туширилди.
Ташриф якунида Қирғиз Республикаси Биринчи хоними Айгул Жапарова томонидан Ўзбекистон Республикаси Биринчи хоними Зироат Мирзиёевага қирғиз халқининг анъанавий миллий мусиқа асбоби — чангқўбиз совға қилинди.
