Самарқандда инстаблогер самосуд қилинди
Ҳолат бўйича ИИБ маълумот берди.
Ижтимоий тармоқларда Самарқандда инстаблогер номаълум шахслар томонидан самосуд қилингани айтилган видеолар тарқалмоқда. Ҳолатга вилоят ИИБ матбуот котиби Жаҳонгир Сагдуллаев расмий муносабат билдирди.
Қайд этилишича, видеодаги ҳолат жорий йилнинг 15 май куни Самарқанд шаҳрида содир бўлган.
Маълум бўлишича, Оқдарё туманида яшовчи А.Т. Самарқанд шаҳрида икки нафар шахслар билан танишиб, улардан иш топиб беришда ёрдам сўраган.
Ушбу фуқаролардан бири ўзи ишлаётган реклама агентлигида ишчи ўрни борлигини айтганида А.Т. ушбу ишга рози бўлиб, улардан биридан йўлкирага пул олиб, уйига кетиб, эрталаб айтилган жойга ишга келмаган.
Натижада уларнинг ўртасида ўзаро келишмовчилик юзага келган. Икки нафар фуқаролар А.Т. билан учрашиб, уни ҳақорат қилиб, буни тасвирга олишган.
Ҳозирда мазкур ҳолат юзасидан Самарқанд шаҳар бўйича ИИО ФМБ томонидан терговга қадар текширув ҳаракатлари олиб борилмоқда.
