Самарқанддаги боғчада гўштни ўғирлаган шахслар жазоланди
Маълум бўлишича, Пахтачи тумани “Ҳайит Элбеги” маҳалласидаги 28-сонли мактабгача таълим ташкилотининг бош ошпази Ўғилой Абдураимова пиширилган гўшт маҳсулотини кирхонага беркитиб, сўнгра кирхона деразасидан уни хўжалик мудираси Мафтуна Эшимовага берган. Пиширилган гўшт ҳажми 4,7 кг бўлган.
Хўжалик мудираси эса гўштни МТТ ҳовлисидан олиб чиқиб кетаётганда, боғча тарбиячилари Н.Н. ҳамда М.У. томонидан ушланган. Бу ҳаракатларни видео ва аудио ёзувлар исботлаган.
Ҳолат бўйича бош ошпаз ҳамда хўжалик мудираси билан суҳбат ўтказилганда, бу ишларни мунтазам равишда МТТ директори Шаҳноз Умарованинг топшириғи ва кўрсатмасига асосан қилганини тан олишган. Шунингдек, ҳақиқатдан ҳам МТТ тарбиячилари Н.Н. ҳамда М.У.нинг айтган гаплари, улар томонидан олинган видео ва аудио ёзувлардаги лавҳалар тўғри эканлигини ўз тушунтириш хатида баён қилишди.
Натижада, бош ошпаз Ў.Абдураимова ва хўжалик мудираси М.Эшимова ишдан бўшатилди. Шу билан бирга, МТТдаги мазкур ҳолат юзасидан ҳуқуқни муҳофаза қилувчи ташкилотлар томонидан қонун доирасида тегишли чоралар кўрилишини белгиланди.
Эслатиб ўтамиз, аввалроқ Самарқандда боғчада болаларга ажратилган гўшт ўғирланаётгани бу ишни қилган шахсларга жиноят иши қўзғатилгани ҳақида хабар берилганди.
Чўлпоной Аҳмедова
