Самарқанд вилоятининг Иштихон туманидаги хонадонлардан бирида газ баллони портлаши юз берди. Бу ҳақида Zamon.uz мухбири хабар бермоқда.
Қайд этилишича, ҳодиса 10 феврал куни туманнинг Деҳқонобод маҳалласида юз берган. Газ баллони портлаши оқибатида бир оиланинг беш нафар аъзоси оғир тан жароҳати олган.
Улар — 64 ёшли кекса эркак, 34 ёшли келин, 7 ёшли қиз, 4 ёшли бола ҳамда 1,5 ёшли чақалоқ бўлган.
Икки нафар вояга етмаган бола турли даражадаги куйиш жароҳатлари билан Республика шошилинч тиббий ёрдам илмий марказининг Самарқанд филиалига олиб келинган. 12 феврал куни яна бир вояга етмаган бола шу муассасага ётқизилган.
Айни пайтда болаларнинг аҳволи оғир экани айтилмоқда. Уларнинг бобоси ва онаси Иштихон туман тиббиёт бирлашмасида даволанмоқда.
Zamon.uz мухбири ҳозирда воқеа жойида бўлиб турибди. Бу бўйича тез орада батафсил репортаж эълон қилинади.