Самарқанддаги хонадонларнинг бирида 2 кишининг жасади топилди
Мазкур ҳодиса Юқори туркман маҳалласида содир бўлган.
Воқеа юзасидан бирламчи хулосаларга кўра, фуқаролар эҳтиётсизлик оқибатида табиий газдан фойдаланиб, этиологик заҳарланишдан вафот этган бўлиши мумкин.
Мазкур ҳолатни ўрганиш учун туман комиссияси тузилган.
Комиссия томонидан бахтсиз ҳодиса содир бўлган жойнинг ҳолати бўйича ўзгаришларни қайд этиш, табиий газдан фойдаланиш ускуна ва жиҳозларнинг тури, русуми, маркаси, уларнинг жойлашув ўрни эътиборга олинган.
Бундан ташқари, техник ҳолатини аниқлаш, дудбўрон ва шамоллатиш каналларининг лойиҳа ҳужжатларига, белгиланган норма ва қоидаларга мувофиқлигини аниқлаш, бахтсиз ҳодиса гувоҳлари билан суҳбат олиб бориш кабилар кўзда тутилган.
Маълумот учун: Самарқанд вилояти Паст Дарғом туманида жойлашган корхоналардан бирининг кириш дарвозаси олдига ўрнатилган металл контейнер ичида икки киши номаълум этиологик заҳарланиш билан вафот этган ҳолда топилган.
Эслатиб ўтамиз, аввалроқ Юнусобод туманидаги хусусий уйлардан бирида беш талабанинг ис газидан заҳарланиб вафот этгани тўғрисидаги иш бўйича суд ҳукми ўқилгани ҳамда 13 ёшли қиз номаълум газдан заҳарланиб, вафот этгани ҳақида хабар берилганди.
Чўлпоной Аҳмедова
