Сирдарёда Тошкентга келтирилаётган сифатсиз гўштлар аниқланди
Ҳозирда ҳолат бўйича жиноят иши очилган.
Истеъмолга яроқсиз гўшт маҳсулотларининг муомалага киритилишининг олди олинди, дея хабар бермоқда Бош прокуратура ҳузуридаги Иқтисодий жиноятларга қарши курашиш департаменти.
Қайд этилишича, департаментнинг Сирдарё вилоят бошқармаси ИИБ ходимлари билан ҳамкорликда терговга қадар текширув ўтказган. Сирдарё туманидаги ЙПХ масканида Қашқадарё–Тошкент йўналиши бўйича ҳаракатланиб келаётган фуқаро М.Х.нинг Lacetti русумли автомашинаси кўздан кечирилганда унинг юкхонасида 156 кг истеъмолга яроқсиз мол гўшти Тошкент шаҳридаги деҳқон бозорига олиб кетилаётгани аниқланган.
Мазкур ҳолат юзасидан Жиноят кодексининг 186-моддаси (хавфсизлик талабларига жавоб бермайдиган товарларни ўтказиш мақсадини кўзлаб ишлаб чиқариш, сақлаш, ташиш ёхуд ўтказиш, ишлар бажариш ёки хизматлар кўрсатиш) билан жиноят иши қўзғатилиб, тергов ҳаракатлари ўтказилмоқда.
