Термизда янги университет ташкил этилади

"Термиз давлат муҳандислик ва агротехнологиялар университетини ташкил этиш чора-тадбирлари тўғрисида"ги Президент қарори қабул қилинди.

 

Термиз муҳандислик-технология институти ҳамда Термиз агротехнологиялар ва инновацион ривожланиш институтини қўшиб юбориш орқали уларнинг негизида Термиз давлат муҳандислик ва агротехнологиялар университети ташкил этилади.

 

Университетда муҳандислик, қишлоқ хўжалиги, ишлаб чиқариш ва хизмат кўрсатиш соҳаларида ҳамда ҳудуднинг олий маълумотли кадрларга бўлган эҳтиёжига мувофиқ олий маълумотли мутахассислар ва илмий-педагог кадрлар тайёрланади.

 

Университетда 2024-2025 ўқув йилидан бошлаб Илғор муҳандислик мактаби фаолияти ташкил этилади.

 

Йирик ишлаб чиқариш корхоналари университетнинг Илғор муҳандислик мактабига саноат ҳамкори сифатида бириктирилади.

 

Термиз муҳандислик-технология институти ҳамда Термиз агротехнологиялар ва инновацион ривожланиш институтида таҳсил олаётган барча талабалар ўқишини университетда давом эттиради ҳамда 2024/2025-ўқув йилидан бошлаб битирувчи курс талабаларига белгиланган тартибда университет дипломи берилади.

 

Университет Термиз муҳандислик-технология институти ҳамда Термиз агротехнологиялар ва инновацион ривожланиш институтининг ҳуқуқ ва мажбуриятлари бўйича ҳуқуқий вориси ҳисобланади.