ЙПХ ходимидан қочган Сaptiva ЙТҲга учради: бир киши жароҳатланди
ЙПХ инспекторининг ҳаракатлари юзасидан хизмат текшируви бошланди.
Сурхондарё вилоятининг Олтинсой туманида ЙПХ ходими тўхташ талабини бажармаган Саptiva автомобилини кузатиб бораётган вақтда йўл-транспорт ҳодисаси содир бўлди. Бу ҳақда вилоят ЙҲХБ ахборот хизмати хабар берди.
Ҳодиса 2026 йил 18 октябрь куни соат 08:20 ларда туманнинг “Янги қурилиш” маҳалласида юз берган.
Маълум қилинишича, ҳайдовчилик ҳуқуқига эга бўлмаган шахс бошқарувидаги Саptiva ЙПХ инспекторининг тўхташ ҳақидаги қонуний талабига бўйсунмай, ҳаракатни давом эттирган. Инспектор хизмат автомобилида унинг ортидан кузатиб борган.
Шу вақтда Саptiva ҳайдовчиси асосий йўлда ҳаракатланаётган Lasetti автомобилининг йўлига чиқиб кетган ва тўқнашув содир бўлган. Натижада Lasetti ҳайдовчиси тан жароҳати олиб, туман тиббиёт бирлашмасига етказилган.
Ҳозирда ҳолат юзасидан Олтинсой тумани прокуратураси томонидан терговга қадар текширув олиб борилмоқда. Шунингдек, ЙПХ ходимининг ҳаракатларига ҳуқуқий баҳо бериш учун хизмат текшируви тайинланган.
