Нафас олишни қийинлаштирган тутун ва чанг: Наманганда корхона фаолияти тўхтатилди
Андижонда эса иккита қўлбола оҳак пишириш ўчоғи бартараф этилди.
Экология ва иқлим ўзгариши миллий қўмитаси ҳудудий бошқармалари томонидан атмосфера ҳавоси сифатини яхшилаш ҳамда фуқаролардан келиб тушаётган мурожаатларни ўрганишга қаратилган рейд тадбирлари давом эттирилмоқда.
Хусусан, Андижон вилояти Экология ва иқлим ўзгариши бошқармаси фуқароларнинг оҳак ва ғишт ишлаб чиқарувчи корхоналардан чиқаётган тутун ҳамда чанг сабабли нафас олиш қийинлашаётгани ҳақидаги мурожаатлари асосида назорат тадбирларини ўтказди.
Ўрганишлар давомида корхоналар фаолияти назоратга олиниб, масъулларга атмосфера ҳавосини муҳофаза қилиш, экологик меъёрларга риоя этиш ва ишлаб чиқариш жараёнларини белгиланган талаблар асосида ташкил қилиш бўйича тушунтиришлар берилди.
Шунингдек, корхоналардаги чанг ва газ тозалаш ускуналарининг самарадорлиги ўрганилиб, лаборатория таҳлиллари учун намуналар олинди. Намуналар белгиланган тартибда текширилади ва натижаларга кўра қонунчиликда назарда тутилган чоралар кўрилади. Ҳудудда аниқланган иккита қўлбола оҳак пишириш ўчоғи ҳам бартараф этилиб, тегишли чоралар кўрилди.
Бундан ташқари, Наманган вилоятидаги «С.М.» ғишт ишлаб чиқариш корхонасида ўтказилган назорат-рейд тадбирида атмосферага юқори миқдорда чанг-газ чиқарилаётгани аниқланди. Шу сабабли корхона фаолияти вақтинча тўхтатилиб, аниқланган камчиликларни бартараф этиш бўйича кўрсатмалар берилди.
Қайд этилишича, рейд тадбирлари республиканинг барча ҳудудларида давом эттирилмоқда.
