Айрим ижтимоий тармоқларда “Мана нега ҳаво заҳарланди” сарлавҳаси остида Тошкент ИЭС томонидан пойтахт ҳавосининг ифлосланиши ҳақида видео тарқатилмоқда. Ушбу видео қарийб 2 йил олдин – 2024 йил февраль ойида олинган бўлиб, бугунги кунга мутлақо мос келмайди. Ўша пайтда станцияда асосий ёқилғи табиий газдан, захира ёқилғи сифатида эса қисқа муддат мазутдан фойдаланилган.
Ҳозирда Тошкент ИЭСда ўрнатилган “Енгил фильтр” қурилмаси чиқиндиларни 99,5 фоиз самара билан тозалайди ва ҳавога ташланадиган қаттиқ заррачалар концентрациясини 100 мг/м³ дан 6 мг/м³ гача камайтиради. Станцияда тутун газлари таркиби юқори аниқликда назорат қилинади ва реал вақт режимида Экология ва иқлим ўзгариши миллий қўмитасининг Ситуацион марказига узатилади.
Шунингдек, станциянинг санитария-ҳимоя ҳудудида замонавий экопост ўрнатилган бўлиб, у атроф-муҳит ҳолатини доимий назорат қилиш ва экологик кўрсаткичларни тезкор мониторинг қилиш имконини беради.
Жорий куз-қиш мавсуми давомида мазут ёқилғисидан фойдаланилмаган ва станция табиий газ асосида ишламоқда.