Тошкент ва Андижон шаҳрида “Майнинг ферма” аниқланди
Ҳозирда ҳолат юзасидан жиноий иш очилган.
Тошкент шаҳрининг Юнусобод тумани ва Андижон шаҳрида “Майнинг ферма” ташкил этган хонадонлар аниқланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Юнусобод туманида ўтказилган тезкор тадбирда “Чингиз Айматов” кўчасида яшовчи А.Р. ўз уйининг ертўласида 4 та тўпламдаги “Antminer” ва “Bitmain Technologies” майнинг қурилмаларини тижорат мақсадида электр тармоғига яширинча улаб, жами 236,7 млн сўмлик электр энергиясидан ноқонуний фойдаланганлиги аниқланган.
Андижон шаҳрида ўтказилган тезкор тадбирда “Навбаҳор” ҳамда “Ҳамкорлик” МФЙ ҳудудидаги хонадонда яшовчи 2 нафар фуқаро ўз уйларида жами 11 та тўпламдаги майнинг қурилмаларини тижорат мақсадида электр тармоғига яширинча улаб, жами 159,5 млн сўмлик электр энергиясидан ноқонуний фойдаланганликлари аниқланган.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
