Тошкент вилоятида 3 киши канализацияда заҳарланиб вафот этди
Канализация қудуғига тушиб, тозалаш ишларини олиб бораётганда заҳарланган 57 ёшли ишчини қутқариш учун тушган 3 киши ҳам ҳушидан кетган.
Тошкент вилояти Нурафшон шаҳрида 3 киши kanalizatsiyada заҳарланиб вафот этди, дея хабар бермоқда Бош прокуратура матбуот хизматига таяниб, «Газета.uz».
Аниқланишича, 20 июль куни «Тошкент коммунал қурилиш сервис» МЧЖ ишчиси — 57 ёшли Қ.А. шаҳарнинг «Тўйтепа» МФЙсида жойлашган сув оқова тармоғи (канализация) қудуғига тушиб, тозалаш ишларини олиб бораётган бўлган. Шу вақтда қудуқ ичидан чиққан заҳарли газ аралашмасидан бўғилиб, ҳушидан кетган.
Натижада ўша ерда бўлган С.М. (23 ёш), Э.К. (55 ёш) ва Ф. Ш. (27 ёш) қудуқ ичига ёрдам бериш мақсадида тушган, аммо улар ҳам ҳушидан кетган.
Оқибатда Қ.А., С.М. ва Э.К. воқеа жойида вафот этган. Ф.Ш. эса ҳушсиз ҳолда жонлантириш бўлимига ётқизилган.
Суд-тиббий экспертизасининг дастлабки маълумотига кўра, фуқароларнинг ўлимига водород сулфиддан ўткир заҳарланиш, ўткир нафас, юрак-қон томир етишмовчилиги кабилар кўрсатилган.
