Тошкентда KIA пойга ўйнаб, пиёдани уриб юборди — видео
Автоҳалокат оқибатида 27 ёшли пиёда вафот этди.
Ижтимоий тармоқда автомашина устахонаси қаршисида икки автомобиль пойга ўйнагани, улардан бири шу ерда турган фуқаронинг уриб юборгани акс этган видео тарқалди. Тошкент шаҳар ИИББ ЙҲХБ ҳодиса юзасидан маълумот берди.
Қайд этилишича, жорий йилнинг 9 май куни соат 17:00 ларда Сергели тумани Қумариқ кўчаси Avtotuning устахонаси қаршисида ҳайдовчи 2000 йилда туғилган А.Х. KIA Stringer русумли автомашинасини бошқариб кетаётиб, пиёда 1997 йилда туғилган Д.К.ни уриб юборган.
ЙТҲ натижасида, пиёда олган тан жароҳатлари билан шифохонага олиб борилган. Аммо, вафот этган.
Мазкур ҳолат юзасидан Тошкент шаҳар ИИББ Тергов бошқармаси томонидан Жиноят кодексининг 266-моддаси 2-қисми билан жиноят иши қўзғатилган. Тергов давом этмоқда.
Қўшимча маълумот: Тошкентдаги пойгада AutoTuning_uz асосчиси 27 ёшли Дониёр вафот этгани айтилмоқда. Бу ҳақда унинг дўстлари ижтимоий тармоқдаги саҳифаларида видеолар жойлаштирди.
Маълумотларга кўра, автоҳалокатдан сўнг, марҳум Чилонзор туманидаги 16-шаҳар касалхонасига ётқизилган. Кўрсатилган тез тиббий ёрдамга қарамасдан, олган тан жароҳатлари оқибатида шифохонада вафот этган.
