Тошкент шаҳрининг Мирзо Улуғбек туманида содир бўлган йўл-транспорт ҳодисаси оқибатида бир киши ҳалок бўлди.
Пойтахт Йўл ҳаракати хавфсизлиги бошқармаси матбуот хизматининг маълум қилишича, 8 январ куни соат тахминан 05:00 да Янги Ўзбекистон кўчасининг иккинчи даражали йўлида 2004 йилда туғилган M.Р. бошқарувидаги Оnix русумли автомобиль ҳаракатланиб келаётиб, руль бошқарувини йўқотган ва йўл четида ҳаракатсиз тўхтаб турган GAZ-63 юк автомашинасига бориб урилган.
ЙТҲ оқибатида Оnix автомобилининг йўловчиси олган тан жароҳатлари сабаб воқеа жойида вафот этган.
Ижтимоий тармоқларда тарқалган видео ва суратларда тўқнашув натижасида ҳар икки транспорт воситаси ёниб кетгани акс этган. Ҳайдовчиларнинг ҳолати ҳақида ҳозирча қўшимча маълумот берилмаган.
Мазкур ҳолат юзасидан Тошкент шаҳар ИИББ Тергов бошқармаси томонидан Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш одам ўлимига сабаб бўлиши) билан жиноят иши қўзғатилган. Тергов ишлари давом этмоқда.