Учтепада аёлга нисбатан уятсиз ҳаракат содир этган эркак 15 суткага қамалди
Суд уни шаҳвоний шилқимлик, майда безорилик ва ИИБ талабларини бажармасликда айбдор деб топди.
Тошкент шаҳри Учтепа туманида аёлга нисбатан уятсиз ҳаракатлар содир этган эркакка нисбатан суд ҳукми ўқилди.
Аввалроқ Лутфий кўчасида жойлашган автобус бекати ва ер ости йўлида содир бўлган ушбу ҳолат жамоатчиликда кенг муҳокамага сабаб бўлган эди. Мазкур ҳолат юзасидан Тошкент шаҳар ИИББ томонидан ўтказилган тезкор-қидирув тадбирлари натижасида гумонланувчининг шахси аниқланган. У 1993 йилда туғилган В. Андрей бўлиб, ички ишлар органлари ходимлари томонидан ушланган эди.
Жиноят ишлари бўйича Учтепа туман суди 2026 йил 7 январь куни ишни кўриб чиқди. Суд материалларига кўра, фуқаро А.Н. 6 январь куни спиртли ичимлик истеъмол қилган ҳолда жамоат жойида аёлга нисбатан уятсиз ҳаракатлар қилган. У дастлаб автобус бекати олдида, кейин эса ер ости йўлида жабрланувчига нисбатан шаҳвоний шилқимлик қилган.
Жабрланувчи аёл судда берган кўрсатмасида содир бўлган воқеалардан қаттиқ қўрққанини, ҳатто хавфсизлик учун дўкон ичида бир муддат пана бўлиб турганини айтган. У эркакка нисбатан қонунда белгиланган қатъий жазо қўлланишини сўраган.
Суд қарорига асосан, А.Н. Маъмурий жавобгарлик тўғрисидаги кодекснинг бир неча моддалари бўйича айбдор деб топилди ва унга 15 сутка маъмурий қамоқ жазоси тайинланди. Шунингдек, ундан 927 минг сўм миқдорида жарима ундирилиши белгиланди.
