“UzAuto Motors” энг яхши ходимларини тақдирлади
Шунингдек, ишчиларнинг оила аъзолари учун компанияга саёҳат уюштирилди.
“UzAuto Motors” Акциядорлик жамияти кадрлар малакасини ошириш ва рағбатлантиришга алоҳида эътибор бериб келади. Ҳар ой компания томонидан бўлинманинг энг яхши ходимини аниқланади ва ғолиблар қимматбаҳо совғалар билан тақдирланади. Ходимларга янада кўпроқ мотивация бериш мақсадида кадрлар бўлими ташаббуси билан компания раҳбарияти шу ойдан бошлаб уларнинг ота-оналари ва оила аъзоларини тақдирлаш маросимига таклиф қилишга қарор қабул қилди.
Апрел ойининг энг яхши ходимларини тақдирлаш маросими уларнинг ота-оналари иштирокида бўлиб ўтди. Ишлаб чиқариш ва технологияларни ривожлантириш бўйича бошқарувчи директор Иқбол Жўраев ўзининг нутқида компаниянинг энг яхши ходимларининг оила аъзолари билан учрашганидан ғоят мамнун эканлигини таъкидлади.
Касаба уюшмаси раиси Ўктам Мирзаев эса ўз сўзида бундай фарзандларни вояга етказган ота-оналарга миннатдорчилик билдирди. Кадрлар бўйича директор ўринбосари Музаффар Шерматов уларга шахсий ва профессионал ўсишни тилади. Ходимлар сертификат ва қимматбаҳо совғалар билан тақдирланди.
Тақдирлаш маросимининг сўнггида ота-оналар учун заводга саёҳат ташкил этилди. Улар фарзандлари меҳнат қилаётган корхонадаги меҳнат фаолияти ва ишлаб чиқариш шароитлари билан яқиндан танишди.
