15 октябрь куни Самарқанд вилояти ҳокими вазифасини бажарувчи Адиз Бобоев раҳбарлигида коррупцияга қарши курашиш ва давлат органлари фаолиятида очиқликни кучайтиришга қаратилган йиғилиш бўлиб ўтди.
Адиз Бобоев коррупция аҳолининг давлат ҳокимиятига бўлган ишончини сусайтирувчи иллат эканини таъкидлаб, бунда ҳар бир раҳбар ҳалол ишлаш бўйича намуна кўрсатиши кераклигини айтди.
“Қачон биз тўхтатамиз бу коррупцияни? Ойликлар ошган бўлса, олаётган иши учун даромадлар ёмон бўлаётган бўлмаса, бу раҳбарлар агар шу ишни қилаётган бўлса, қолганлар кейин “фалончи олди-ку, менинг бошлиғим”, дейди. “Мен нима учун олмаслигим керак экан?” дейди. Кейин у ҳам қўшилади, сўнг учинчиси қўшилади, кейин тўртинчиси қўшилади. Бўлди, шу билан ҳамма вилоятдан бошлаб то туман, маҳаллагача ҳаммаси пастга тушгунча тўлиқ кетаверади. Чунки тепадан бошландими, пастга қараб давом этади.
Халқ кўриб турибди. Сизлар нима деб ўйлайсизлар, халқ билмайди, дебми? Халқ ҳаммасини билиб ўтирибди. Ҳаммасини кўриб ўтирибди. Ким қандай қилиб уй қилган, ким қандай қилиб машина олган. Билмайди дейсизларми халқ? Ҳамма билади. Ҳамма ўзига хулоса қилиб олсин”, деган Адиз Бобоев.