Харрис Байден билан бирга номзодини илгари суришга тайёрлигини маълум қилди
Шунингдек, у АҚШ вице-президенти лавозимининг аҳамияти ҳақида гапирган.
АҚШ вице-президенти Камала Харрис 2024 йилда Байден билан сайловда иштирок этишга тайёрлигини билдирди.
“Президент яна бир марта номзодини илгари суришини аниқ айтди. Агар у буни амалга оширса, мен ҳам ўз номзодимни у билан бирга қўйишга тайёрман”, – деган вице-президент NBC телекомпаниясига берган интервьюсида.
Бундан ташқари, у ўз вазифасига катта масъулият билан ёндашишини айтган. Харриснинг сўзларига кўра, АҚШ вице-президенти давлат раҳбарига мамлакат тақдирига таъсир кўрсатадиган муҳим масалаларни ҳал этишга ёрдам беради.
Июль охирида Байденнинг матбуот котиби Карин Жан-Пьер унинг 2024 йилги сайловда иштирок этишини маълум қилганди.
Аввалроқ Трамп тез орада президентликка номзодини илгари суриш бўйича қарор қабул қилишини айтганди.
