«Хитой – Қирғизистон – Ўзбекистон» мултимодал транспорт йўлаги очилди
Юк поезди Хитойдан Тошкентга 15 кунда етиб келиши белгиланган.
«Хитой – Марказий Осиё» саммити доирасида Сиан шаҳрида эришилган келишувларни амалга ошириш мақсадида «Zhejiang Union of Railway Logistics» компанияси, «Ўзбекистон темир йўллари» АЖ ва «Қирғиз темир йўли миллий компанияси» давлат корхонаси ҳамкорлигида Ланджоу станциясидан Тошкентга 30 та контейнердан иборат блок поезди ҳаракати йўлга қўйилди.
Транспорт вазирлигининг маълум қилишича, «Хитой – Қирғизистон – Ўзбекистон» мултимодал транспорт йўлаги бўйлаб юк ташишни рағбатлантириш мақсадида илк синов поезди ҳаракатига 9 июнь куни старт берилган.
Таркибида қуёш панеллари, механик жихозлар, матолар ва бошқа юклар бўлган умумий қиймати 2,5 млн АҚШ долларини ташкил этувчи юк поезди Хитойнинг Ланджоу шаҳридан Тошкентга 15 кунда етиб келиши белгиланган.
