Ўзбекистон Миграция агентлиги Япониянинг Проуд Партнерс компанияси билан ҳамкорликда ўзбекистонликларга мўлжалланган иш имкониятларини эълон қилди. Дастур доирасида 250 та етказиб берувчи ҳайдовчи ва 150 та қурилиш соҳаси иш ўринлари мавжуд бўлиб, номзодлар Тошкентда 1–2 декабрь кунлари бўлиб ўтадиган суҳбат орқали танланади.
Ҳайдовчилар учун Б ёки С тоифадаги гувоҳнома, 21–35 ёш ва хавфсизлик қоидаларига риоя қилиш талаб қилинади. Қурилиш соҳаси ишчилари эса 18–35 ёш оралиғида бўлиши, меҳнат интизоми ва хавфсизликни таъминлай олиши керак.
Иш берувчи томонидан 2000 АҚШ долларидан бошланувчи маош, йилига икки марталик бонус, турар жой, тиббий суғурта ва авиачипта харажатларини қоплаш каби имтиёзлар таклиф этилади. Шу билан бирга, япон ёки инглиз тилини билган номзодлар устунликка эга бўлади.
Ангрен шаҳрида бепул япон тили курслари ҳам ташкил этилиши режалаштирилган. Ушбу ташаббус, Ўзбекистон фуқароларини хорижда тартибли ва юқори маошли иш ўринларига йўналтиришга қаратилган тизимли ишларнинг давомидир, натижада хориждан юборилаётган маблағ миқдори сезиларли ошмоқда.