Qirg‘izistonda Turkiya fuqarolariga noqonuniy pasport berish bo‘yicha jinoyat ishi ochildi
Qirg‘iziston poytaxti Bishkek shahar politsiyasi 2016 yilda Turkiya fuqarolariga noqonuniy pasport berilishi bilan bog‘liq holat yuzasidan korrupsiya moddasi bo‘yicha sudgacha bo‘lgan tergov jarayonini boshladi. Bu haqda respublika Ichki ishlar vazirligi xabar berdi.
Maʼlumotlarga ko‘ra, hujjatlarni noqonuniy rasmiylashtirish to‘g‘risidagi qaror mamlakat prezidenti huzuridagi Fuqarolik masalalari bo‘yicha komissiya tomonidan qabul qilingan va davlat rahbari tomonidan maʼqullangan. O‘sha paytda Qirg‘izistonni Almazbek Atamboyev boshqargan.
«Tergov jarayonida 2016 yilda Turkiyaning 10 nafar fuqarosini Qirg‘iziston fuqaroligiga qabul qilish to‘g‘risida noqonuniy qaror qabul qilingani aniqlandi», deyiladi vazirlik xabarida.
Maʼlum qilinishicha, Qirg‘iziston Jinoyat kodeksining korrupsiya to‘g‘risidagi 319-moddasi moddasiga ko‘ra, ushbu jinoyatga qo‘l urgan shaxsga nisbatan 15 yilgacha ozodlikdan mahrum qilish shaklida eng yuqori jazo belgilangan bo‘lib, ushbu hukm jinoyat jinoiy guruh manfaatlari yo‘lida sodir etilgan bo‘lsagina amal qiladi.
«Hozir tergovchilar jinoyatga aloqador shaxslarni aniqlamoqda», deya qo‘shimcha qilingan xabarda.
Maʼlumot uchun, 2019 yil avgustda qo‘lga olingan Almazbek Atamboyev bir qator jinoyatlarda ayblanib, 11 yilu 2 oy qamoq jazosiga hukm qilingan. Unga qo‘yilgan asosiy ayblov sifatida kriminal Aziz Batukayevni ozodlikka chiqarish keltirilgan. 2013 yilda 16 yil qamoq jazosiga hukm qilingan Batukayev muddati yakunlanmay turib ozodlikka chiqarilgan. Atamboyev prezidentlikdan ketgach, bu ish borasida tekshiruv boshlangan. Atamboyev aybini tan olmagach, harbiylar uning uyiga bostirib kirib, qo‘lga olgandi.
