Tramp yana amerikaliklarga pul va’da qildi: 20 milliondan ortiq keksaga 90 dollardan beriladi
Oq uyga ko‘ra, mablag‘ Medicare Improvement Fund hisobidan ajratilib, aksariyat fuqarolarga oktabr oyining boshida to‘g‘ridan-to‘g‘ri o‘tkaziladi.
AQSh prezidenti Donald Tramp Medicare dasturining Part B yo‘nalishida ro‘yxatdan o‘tgan 20 milliondan ortiq keksa amerikalikka bir martalik 90 dollarlik to‘lov berilishini ma’lum qildi. Bu haqda Reuters xabar berdi.
Oq uy ma’lumotlariga ko‘ra, to‘lovlar Medicare Improvement Fund hisobidan amalga oshiriladi. Aksariyat fuqarolarga 90 dollar oktyabr oyining boshida bank hisobiga to‘g‘ridan-to‘g‘ri o‘tkaziladi, bank orqali to‘lov olish imkoniga ega bo‘lmaganlarga esa chek yuboriladi.
Mazkur to‘lovlar Trampning amerikaliklarga pul berish haqidagi boshqa va’dalari fonida e’lon qilindi. Prezident sentyabr oyida Respublikachilar partiyasi noyabr oyidagi oraliq saylovlarda Vakillar palatasi va Senatda nazoratni saqlab qolsa, har bir voyaga yetgan AQSh fuqarosiga 5 ming dollardan berilishini aytgan edi. Tramp bu rejani “Trump dividend” deb atagan va 3-oktyabr kuni ham va’dasini takrorlagan.
Biroq 5 ming dollarlik to‘lov hozircha amalga oshirilayotgani yo‘q. Trampning bayonotiga ko‘ra, bu mablag‘ faqat respublikachilar saylovdan keyin Kongressning har ikki palatasidagi nazoratni saqlab qolgan taqdirda berilishi ko‘zda tutilgan. Taklifni amalga oshirish uchun esa Kongress tomonidan tegishli qaror va mablag‘ ajratilishi kerak bo‘ladi.
