Rossiyada «o‘lat xavfi» sabab bir qator shifoxonalar karantinga olindi
Bunga 28 yoshli tibbiyot xodimining vafot etgani sabab bo‘lgan. Ayni paytda u bilan aloqada bo‘lgan qariyb 200 kishi ham izolyatsiya qilingan.
Rossiyaning Irkutsk viloyatida o‘latga qarshi institut xodimasi vafot etganidan so‘ng bir qator shifoxonalarda karantin joriy qilindi. Bu haqda “Meduza” nashri yozmoqda.
Maʼlumotlarga ko‘ra, 28 yoshli laborant Darya Shipilova 2 oktyabrga o‘tar kechasi vafot etgan. U Irkutskdagi O‘latga qarshi institutda ishlagan. Xodima 29 sentyabr kuni Shelexovdagi shifoxonaga yotqizilgan.
Vaziyat sabab Shelexovdagi markaziy shifoxona karantinga o‘tkazilgan. Ayrim bo‘limlarda bemorlarni qabul qilish va chiqarish vaqtincha cheklangan.
“Rospotrebnadzor” marhumada kelib chiqishi nomaʼlum pnevmoniya bo‘lganini maʼlum qilgan.
Ayni paytda 1-, 3- va 10-sonli shahar klinik shifoxonalari, tug‘ruqxona hamda Ivano-Matreninsk bolalar klinik shifoxonasi karantinga yopilgan. Bundan tashqari, Shelexov shahridagi Irkutsk alyuminiy zavodida (IrkAZ) niqob taqish rejimi joriy etilgan.
Irkutsk viloyati gubernatori Igor Kobzev 2 oktyabr kuni epidemiyaga qarshi komissiyaning navbatdan tashqari yig‘ilishini o‘tkazgan. Unda Rossiyaning bosh davlat sanitariya shifokori Anna Popova ham ishtirok etgan. Yig‘ilishga fuqarolardan birida «o‘ta xavfli infeksiya» aniqlangani ehtimoli sabab qilib ko‘rsatilgan.
Kobzevning so‘zlariga ko‘ra, epidemiyaga qarshi barcha zarur choralar ko‘rilmoqda. Yaqin aloqada bo‘lgani aniqlangan barcha shaxslar esa tibbiy kuzatuvga olingan.
Marhuma ayol bilan aloqada bo‘lgan 197 nafar shaxs tibbiy kuzatuvga olingan. Ularda hozircha kasallik belgilari aniqlanmagan.
