Telegram asoschisi Pavel Durov 2011 yildan buyon telefonlari kuzatilishini aytdi
“VKontakte” ijtimoiy tarmog‘i va Telegram messenjeri asoschisi Pavel Durov telefoni maxsus dasturlar orqali kuzatilayotganini 2018 yildayoq bilganini aytdi.
Bu haqda u o‘z Telegram-kanalida yozdi.
"Allaqachon, 2018 yildayoq men telefonlarimdan biri maxsus dasturlar yordamida kuzatuv ro‘yxatiga kiritilganini bilardim. Men hayron bo‘lmadim, chunki 2011 yildan beri ishlatadigan telefonlarim oldindan kuzatilishiga ko‘nikib qolganman. Mening shaxsiy maʼlumotlarimga kira olgan odamning hafsalasi pir bo‘ladi, chunki ular hech qanday muhim maʼlumot topa olishmaydi" , - deb yozgan Durov.
Oldinroq Fransiya prezidenti Emmanuel Makron, o‘sha paytdagi bosh vazir va yana 14 vazirning telefonlarida Isroilning Pegasus dasturiy taʼminoti orqali josuslik qilingan bo‘lishi mumkinligi haqida xabar bergan edik.
Pegasus dasturiy taʼminoti ishlab chiquvchisi, Isroilning NSO Group tashkiloti Pavel Durov ham maxsus dastur yordamida kuzatuvda bo‘lgan odamlar qatorida bo‘lishi mumkinligini eʼlon qilgan.
Sharofat Mahmudova
