Telegram’dagi zaifliklar bo‘yicha bahs: Durov xakerlarni o‘z akkauntini buzishga chaqirdi
U shunchaki xabar olish orqali profilni egallab olish mumkinligi haqidagi da’volarni rad etdi.
Telegram asoschisi Pavel Durov messenjerda aniqlangan zaifliklar haqidagi xabarlarga munosabat bildirdi. U xakerlarni o‘zining shaxsiy akkauntini buzib kirishga chaqirdi.
Durovning ta’kidlashicha, ayrim OAVda yozilganidek, shunchaki xabar yuborish yoki uni qabul qilish orqali foydalanuvchi akkauntini egallab olish mumkin emas. Buning uchun avval uchinchi tomon xizmatini faol ishga tushirish talab etilgan. Uning so‘zlariga ko‘ra, bu muammo ham server tomonida bartaraf etilgan.
«Agar boshqacha fikrda bo‘lsangiz, akkauntimni buzib kirishga urinib ko‘ring», — deb yozdi Durov va o‘z profiliga havola qoldirdi.
Bayonotga 11-noyabr kuni V12 nomli «axloqiy xakerlar» guruhi tomonidan namoyish etilgan zaiflik sabab bo‘lgan. Mutaxassislar Android tizimidagi Telegram vidjeti orqali begona kodni ishga tushirish mumkinligini ko‘rsatgan. Namoyishda foydalanuvchi bot bilan suhbatga kirib, ishga tushirish tugmasini bosganidan so‘ng vidjet kalkulyatorni ochgan.
Shuningdek, telejam loyihasi muallifi Windows uchun Telegram versiyasida vidjetlar orqali kodni ishga tushirishning yana ikkita usulini e’lon qilgan. Unga ko‘ra, maxsus tayyorlangan xabarlar vidjet suhbatda paydo bo‘lishi bilanoq, foydalanuvchi hech qanday tugmani bosmasdan kalkulyatorni ishga tushirishi mumkin.
Biroq buning uchun ham dastlab bot orqali vidjetning suhbatda paydo bo‘lishi talab etiladi. Hozircha Telegram vidjetlaridagi zaifliklar orqali akkauntlarning ommaviy buzib kirilgani haqida tasdiqlangan ma’lumot yo‘q.
