Ukraina jang maydonida robotlardan foydalanmoqda: ular hujum va evakuatsiyaga jalb etilmoqda

Ukraina armiyasi Rossiyaga qarshi urushda yer usti jangovar robotlaridan tobora ko‘proq foydalanmoqda. Bild nashrining yozishicha, mamlakat harbiylari granatomyotlar, portlovchi moddalar va hatto tankka qarshi qurollar bilan jihozlangan robotlarni jang maydoniga jalb qilmoqda.

 

Nashr ma’lumotlariga ko‘ra, oktyabr oyi oxirida Liman shahri yaqinida robotlar piyodalar hamrohligisiz Rossiya pozitsiyalariga hujum uyushtirgan.

 

Rossiya propagandasi bilan bog‘liq harbiy Telegram-kanallarda ushbu hujum muvaffaqiyatsiz yakunlangani haqida xabarlar tarqalgan. Ularda dronlar robotlarni nishonga olgani va ularning barchasi yo‘q qilingani aytiladi. Biroq bu ma’lumotlarni mustaqil ravishda tasdiqlash imkoni yo‘q. Shunga qaramay, Ukraina tomonidan amalga oshirilgan mazkur hujum urush jarayoni tobora robotlashtirilayotganini ko‘rsatadi.

 

Ekspertlar bunday robotlarning uchuvchi dronlar bilan o‘zaro hamkorligini alohida ahamiyatga ega deb hisoblaydi. Havodagi dronlar yer usti robotlari uchun «ko‘z» vazifasini bajarib, ularning harakatini boshqaradi va hatto front ortiga olib o‘tishi mumkin.

 

Ukraina Mudofaa vazirligi ma’lumotlariga ko‘ra, oktyabr oyida yer usti robotlari logistika va evakuatsiya bilan bog‘liq 31398 ta operatsiyani bajargan. Yanvar oyida esa bu ko‘rsatkich 7511 tani tashkil etgan.

 

Hozircha robotlarning aksariyati bevosita jangovar harakatlarda qatnashmayapti. Ular asosan yuk tashish, yaralangan va halok bo‘lgan harbiy xizmatchilarni evakuatsiya qilish uchun qo‘llanmoqda.