Janubiy Koreyada o‘zbekistonlik talaba qamaldi: u terrorchilik guruhini moliyalashtirishda ayblandi
U Suriyadagi terrorchilik tashkiloti a’zosiga olti marta pul o‘tkazgan.
Janubiy Koreya sudi talabalik vizasi bilan mamlakatda yashab kelgan O‘zbekiston fuqarosini Suriyadagi «Tavhid va jihod katibasi» (KTJ) terrorchilik tashkilotini moliyalashtirishda aybdor deb topdi. U tashkilot a’zosiga jami 1,25 million von (taxminan 936 dollar) o‘tkazgani uchun 16 oyga ozodlikdan mahrum etildi.
Sud materiallariga ko‘ra, O‘zbekiston fuqarosi Janubiy Koreyada koreys tilini o‘rganish uchun mo‘ljallangan D-4-1 vizasi asosida yashagan. U bilan o‘zini o‘zbekistonlik deb tanishtirgan KTJ a’zosi bog‘langan. Mazkur shaxs Suriyada hukumat qo‘shinlari va Rossiyaga qarshi jang qilayotganini aytgan.
2024-yil yanvaridan 2025-yil yanvarigacha talaba tashkilot vakili ko‘rsatgan hisob raqamlariga olti marta pul o‘tkazgan. O‘tkazmalarning umumiy miqdori 1,25 million vonni tashkil etgan. Talaba tashkilotning terrorchilik faoliyati bilan shug‘ullanishini bilganiga qaramay, unga pul yuborishda davom etgan.
Tergovda KTJ vakili talabadan Janubiy Koreyada yashovchi boshqa bir shaxsdan pul olib, uni Suriyaga jo‘natishni ham so‘ragani aniqlangan. Talaba bu topshiriqni bajarmagan. Biroq sud mazkur harakatni ham jinoyat sodir etishga urinish sifatida baholagan.
Sudya Ho So Yun O‘zbekiston fuqarosini terrorizmga qarshi kurash to‘g‘risidagi qonunchilikni buzganlikda aybdor deb topgan. Sud qarorida terrorchilik tashkilotlarini moliyalashtirish xalqaro tinchlik va jamoat xavfsizligiga tahdid solishi qayd etilgan.
Jazo tayinlashda sudlanuvchining aybiga iqror bo‘lgani inobatga olingan. U 16 oylik qamoq jazosiga hukm qilingan. Shuningdek, undan 1,25 million von undirish belgilangan.
KTJ 2014-yil dekabrida tashkil etilgan bo‘lib, BMT Xavfsizlik kengashining sanksiyalar ro‘yxatiga kiritilgan. Guruh 2016-yilda Qirg‘izistondagi Xitoy elchixonasi yaqinida sodir etilgan portlash hamda 2017-yilda Sankt-Peterburg metrosida yuz bergan teraktga aloqadorlikda gumonlangan.
O‘zbekiston fuqarosining ismi, yoshi va tahsil olgan universiteti oshkor etilmagan. Shuningdek, birinchi instansiya sudi hukmi ustidan shikoyat berilgani yoki qaror qonuniy kuchga kirgani haqida ma’lumot yo‘q.
