Zangiota tumanida universitet ochiladi
Zangiota tumanida joylashgan «Tashkent Pharma Park» innovatsion ilmiy-ishlab chiqarish farmatsevtika klasterida Farmatsevtika texnik universiteti tashkil etiladi. Vazirlar Mahkamasining tegishli qarori loyihasi muhokamaga qo‘yildi.
Qarorga ko‘ra, oliygohda dori vositalari, tibbiy buyumlar va tibbiy texnika ishlab chiqarish, farmatsevtika, biotexnologiya, tibbiyot, kosmetologiya, menejment, biznes boshqarish va boshqa tarmoqlarda xalqaro taʼlim standartlariga muvofiq malakali kadrlar tayyorlash ko‘zda tutilgan.
Universitet faoliyati, o‘quv-uslubiy boshqaruvi, ilmiy-pedagogik xodimlarni tayyorlash va qayta tayyorlash zamonaviy axborot texnologiyalari, fan va texnologiyalarning eng yangi yutuqlaridan foydalangan holda xodimlar tayyorlashning umumeʼtirof etilgan xalqaro standartlariga muvofiq amalga oshiriladi.
Shuningdek, qarorda taʼlim berish pullik-kontrakt asosida bo‘lib, kunduzgi, kechki, sirtqi, masofaviy taʼlim shaklida ingliz va boshqa tillarda oliygoh hamda hamkor universitetlarda qabul qilingan taʼlim standartlari, o‘quv rejalari, bakalavriat, magistratura, doktorantura dasturlariga ko‘ra amalga oshirish belgilangan.
Universitetga qabul 2022-2023 o‘quv yilida boshlanadi.
