141 nafar o‘zbekistonlik Rossiyadagi kosmodrom yaqinida ishlash uchun jo‘nab ketdi
Tashqi mehnat migratsiyasi agentligi hamda Rossiyaning “Povoljskoye Stroitelnoye Predpriyatiye” MCHJ o‘rtasida imzolangan hamkorlik kelishuvi asosida, agentlikning mintaqaviy filiallarida qurilish sohasida ishlash istagida bo‘lgan fuqarolar ishtirokida tanlov o‘tkazilgandi.
Namangan viloyatida ushbu tanlovdan muvaffaqiyatli o‘tib, tibbiy ko‘rik natijalari ijobiy chiqqan 141 nafar fuqaro Namangan xalqaro aeroportidan Rossiyaning Amur viloyatida kosmodrom atrofidagi qurilish obyektlarida ishlash uchun jo‘nab ketdi.
Tadbirda agentlikning Namangan viloyati filiali masʼul xodimlari tomonidan vaqtinchalik mehnat faoliyatini amalga oshirish uchun ketayotgan fuqarolarga o‘z yo‘nalishlari bo‘yicha tushuntirish, targ‘ibot ishlari olib borilib, sohalarga oid buklet, tarqatma materiallar berildi, deyiladi maʼlumotda.
Taʼkidlanishicha, ushbu fuqarolarni karantin manziliga joylashtirish, ro‘yxatga olish, ishlash huquqini beruvchi patent, 3 mahal ovqat, yotoqxona, maxsus kiyim xarajatlari ish beruvchi tomonidan qoplanadi.
