Moskva viloyatida muhojirlar o‘rtasida ommaviy mushtlashuv sodir etildi

Unda jami 60 nafarga yaqin muhojir qatnashgan. Guvohlarga ko‘ra, ishtirokchilarning qo‘lida pichoq va temir bo‘laklari bo‘lgan. Voqea oqibatida IIV qo‘lga olingan muhojirlarni qayta mamlakatga kirish huquqidan mahrum qilib, deport qilish harakatini boshlagan. 
Qayd etilishicha, 6 avgustga o‘tar kechasi "Odinburg" turar-joy majmuasida ommaviy mushtlashuv yuz bergan. Manbalarga ko‘ra, tortishuv  sobiq Ittifoq respublikalari, shuningdek, Rossiya Federasiyasining Janubiy hududlaridan kelganlar o‘rtasida yuz bergan. 
Shu kuni Moskva viloyatining Mitishi shahrida ham shunga o‘hshash voqea sodir bo‘lgan. U yerda 40 ga yaqin muhojir ommaviy otishma-mushtlashuv ishtirokchisiga aylandi. 
Qurolli otishma “Chegarachi” ko‘chasida yuz bergan. Unda, asosan,Markaziy Osiyo davlatlari fuqarolari ishtirok etgan. Dastlabki ma’lumotlarga ko‘ra jarohatlanganlar  bor. 
Norasmiy xabarlarda aytilishicha, tortishuv Rossiyaga ishlash uchun borgan o‘zbek, chechen va tojik millatiga mansub kishilar o‘rtasida yuz bergan. 
Rossiya ichki ishlar vazirligining Moskva viloyatidagi matbuot xizmati holat yuzasidan Rossiya Federasiyasi Jinoyat kodeksining 213-moddasi (“bezorlik”) bilan jinoyat ishi ochilganini bildirdi.

RF Ichki ishlar vazirligi tahlillari so‘nggi vaqtlarda Rossiyada muhojirlar orasida bu kabi tortishuv va tartibbuzarliklar soni ortganini ko‘rsatmoqda. Idora ma’lumotlariga ko‘ra, mamlakatda ayni kunlarda MDH davlatlaridan kelgan 700 mingdan ortiq muhojir noqonuniy faoliyat olib bormoqda. 
Hozirga qadar qurolli to‘qnashuv bo‘yicha O‘zbekiston Respublikasi Tashqi mehnat migrasiyasi agentligi tomonidan hech qanday munosabat bildirilmadi.