Qozog‘istonda davlat to‘ntarishiga urinishning oldi olindi: 10 kishi ushlandi
Qo‘lga olinganlar ekstremistik guruh tuzish, terrorizmni targ‘ib qilish va diniy adovat qo‘zg‘atishda gumon qilinmoqda.
Qozog‘iston Milliy xavfsizlik qo‘mitasi (MXQ) mamlakat g‘arbida konstitutsiyaviy tuzum asoslarini zo‘rlik bilan o‘zgartirishni rejalashtirganlikda gumonlangan 10 kishini qo‘lga oldi. Bu haqda idora matbuot xizmati xabar berdi.
Ma’lum qilinishicha, 30-oktyabr kuni Atirau shahrida prokuratura organlari muvofiqlashtiruvi ostida o‘tkazilgan tezkor tadbir davomida 10 kishi bir vaqtda qo‘lga olingan.
Ular ekstremistik guruh tuzish, unga rahbarlik qilish va faoliyatida ishtirok etish, shuningdek, terrorizmni targ‘ib qilish hamda diniy adovat qo‘zg‘atishda gumon qilinmoqda. Tergov talqiniga ko‘ra, guruh a’zolari Qozog‘istonning g‘arbiy hududida konstitutsiyaviy tuzum asoslarini zo‘rlik bilan o‘zgartirishni maqsad qilgan.
Gumonlanuvchilarning yashash joylarida o‘tkazilgan tintuvlar davomida o‘qotar qurollar, giyohvand moddalar, diniy buyumlar, adabiyotlar va boshqa ashyoviy dalillar olib qo‘yilgan.
Shuningdek, guruh a’zolari tomonidan bolalar va o‘smirlar uchun tashkil etilgan uchta yashirin o‘quv markazi faoliyatiga chek qo‘yilgan. MXQ ma’lumotiga ko‘ra, guruhning ayrim a’zolari avval ham terrorchilik va boshqa jinoiy huquqbuzarliklar uchun sudlangan.
Qozog‘iston MXQsi tergovga oid boshqa ma’lumotlar oshkor etilmasligini bildirgan.
