Mayda bezorilikdan politsiya buyrug‘iga bo‘ysunmaslikkacha: Rossiyada deportatsiya choralari kengaytirildi
Migratsiya qoidalarini buzganlik uchun jazolar kuchaytirildi.
Rossiyada ma’muriy huquqbuzarlik sodir etgan xorijiy fuqarolarni mamlakatdan deportatsiya qilishga asos bo‘ladigan holatlar ro‘yxati kengaytirildi. Yangi tartib 3-noyabrdan kuchga kirgan federal qonunda belgilangan.
Rossiya Ichki ishlar vazirligining Migratsiya xizmati ma’lum qilishicha, deportatsiya bilan jazolanishi mumkin bo‘lgan ma’muriy huquqbuzarliklar soni ikki baravar oshib, 45 taga yetgan.
Ular qatoriga mayda bezorilik, ommaviy tadbirlarni o‘tkazish qoidalarini buzish, politsiyaning qonuniy talablariga bo‘ysunmaslik hamda Rossiya Qurolli Kuchlarining obro‘sini tushirish kabi holatlar kiritilgan.
Shuningdek, deportatsiya boshqa ma’muriy jazolar bilan almashtirilishi mumkin bo‘lmagan huquqbuzarliklar ro‘yxati ham kengaytirilgan. Unga giyohvand moddalar noqonuniy aylanishi bilan bog‘liq ma’muriy qoidabuzarliklar ham kiritilgan.
Qonun migratsiya sohasidagi huquqbuzarliklar uchun belgilangan ma’muriy jarimalarning eng kam va eng yuqori miqdorlarini ham oshiradi.
Migratsiya xizmati yangi tartib jamoat xavfsizligiga tahdid soladigan xorijiy fuqarolar va fuqaroligi bo‘lmagan shaxslarni mamlakatdan chiqarib yuborish jarayonini samaraliroq va tezroq amalga oshirishga qaratilganini bildirgan.
