Namanganda yer to‘satdan o‘pirilib, unga mashinaning old qismi tushib ketdi
Bugun ijtimoiy tarmoqlarda Namangan shahar Davlat xizmatlari markazi avtoturargohida Jentra rusumli avtomashina qo‘yilgan yer to‘satdan o‘pirilib tushgani, uning ustidagi avtomashina esa ushbu chuqurga tushib ketgani tasvirlangan videolavha tarqaldi.
Mazkur holat yuzasidan Namangan shahar hokimi matbuot kotibi Baxtiyor Nosirov bilan bog‘landik. Mutaxassis bergan maʼlumotga ko‘ra, voqea Namangan shahri Davlat xizmatlari markazi avtoturargohiga yaqin bo‘lgan hududda sodir bo‘lgan.
Davlat xizmatlari markazi binosida ijaraga faoliyat yuritayotgan bank xodimi avtoturargohga yaqin bo‘lgan joyga avtomashinasini qo‘ygan. Mashina qo‘yilgan yer to‘satdn o‘pirilib uning oldi qismi chuqurlikka tushib ketgan.
O‘rganish davomida o‘pirilgan yer bino yerto‘lasiga havo kirishi uchun ochib qo‘yilgan maxsus joy bo‘lib, uning ust qismi quruvchilar tomonidan yengil-yelpi yopilgani tufayli mashina og‘irligini ko‘tarolmay o‘pirilib tushgani maʼlum bo‘ldi. Bank xodimi va mashinaga zarar yetmagan.
