Qarshi tumani hokimi Maqsuda Mustafoyevaga hayfsan berildi
Qashqadaryo viloyati hokimining qarori bilan ishda yo‘l qo‘ygan kamchiliklari uchun Qarshi tumani hokimi Maqsuda Mustafoyeva hayfsan intizomiy jazosini olgan. Bu haqda viloyat hokimligi axborot xizmati xabar bermoqda.
Maʼlum qilinishicha, 23 iyul kuni Qashqadaryo viloyati hokimligida tanqidiy yig‘ilish o‘tkazilgan. Yig‘ilishda O‘zbekiston Respublikasi prezidenti sayloviga tayyorgarlik ko‘rish ishlari bo‘yicha yo‘l qo‘yilgan xato va kamchiliklar ham muhokama qilingan. Muhokama jarayonida Qarshi tumanida ishlar qoniqarsiz olib borilgani aytilgan.
Qayd etilishicha, joriy yil 12 avgust kuni yig‘ilish yakunlari bo‘yicha Qashqadaryo viloyati hokimining “Intizomiy javobgarlikka tortish to‘g‘risida”gi qarori qabul qilingan. Unga ko‘ra, qator kamchiliklarga yo‘l qo‘ygani uchun Qarshi tumani hokimi Maqsuda Mustafoyevaga nisbatan O‘zbekiston Respublikasi Mehnat kodeksining tegishli moddasiga asosan “Hayfsan” intizomiy jazosi qo‘llanilgan.
Qarorda yozilishicha, joriy yilning birinchi yarmida o‘tgan yilning shu davriga nisbatan Qarshi tumanida aholidan kelib tushgan murojaatlar soni 67 foizga ko‘paygan. Tumandagi 18 ta saylov uchastkasi mutlaqo talabga javob bermasligi maʼlum qilingan. Bundan tashqari, Qarshi tumani hokimi Maqsuda Mustafoyeva va boshqa sektorlar rahbarlari og‘ir hududlarga umuman bormagan, ulardagi muammolar bilan qiziqmagan.
