Yondosh kasalligi bo‘lgan bemor koronavirusdan uy sharoitida davolanishi mumkinmi?
Mazkur savolga tibbiyot fanlari doktori, professor Ulug‘bek Qayumov javob berdi.
— Maʼlumki, yurtimizda koronavirus infeksiyasi bilan kasallangan bemorlarni davolash bo‘yicha 8-versiya standartlari ishlab chiqilgan bo‘lib, bemorlar uy sharoitida ham ana shu standartlarga rioya qilgan holda davolanishlari maqsadga muvofiq, — deydi professor.
— Shu maʼnoda aytsak, agar yondosh kasalligi bo‘lgan bemorning tana harorati 38 darajadan oshmasa va isitma ko‘tarilishi surunkali davom etmasa, shuningdek, nafas olishi, yurak urishi bir meʼyorda bo‘lsa, bunday hollarda koronavirusdan uy sharoitida davolanish mumkin bo‘ladi.
Biroq qandli diabetga chalingan bemorning qonida qand miqdorining oshishi yoki tushib ketishi kuzatilsa, ular albatta statsionar sharoitda davolanishi lozim.
Qon bosimi meʼyordan oshib yoki tushib ketganda ham shifoxonaga yotish kerak bo‘ladi.
Agar koronavirusga chalingan bemorning qandli diabet xastaligi bo‘lsa-yu, qonda qand miqdori meʼyorda tursa, bunday kasallar uyda davolanishlari mumkin.
Shuni bilish kerakki, hozirda shifoxonaga og‘ir ahvolda murojaat qilayotganlarning aksariyati uyda o‘zboshimchalik bilan davolangan bemorlardir. Yaʼni, ular kasallikni davolash uchun o‘z vaqtida to‘g‘ri muolaja qilmagan.
Shu bois hamyurtlarimizdan odamlardan turli davo usullarini eshitib, muolaja qilmasliklarini so`rab qolamiz.
Uy sharoitida davolanganda albatta shifokor nazoratida bo‘lish zarur.
