Minsk Varshavani afg‘on qochoqlarini Belarus hududiga siqib chiqarishda ayblamoqda
Belarus davlat chegara qo‘mitasi xabariga ko‘ra, voqea 18 avgustda sodir bo‘lgan. “BELTA” xabariga ko‘ra, polshalik harbiylar bir necha harbiy transportda migrantlarning katta guruhini chegaragacha olib kelib, kuch bilan Belarus hududiga chiqarishga uringan.
Qochoqlar norozilik bildirish maqsadida Polshada lager tashkil qilgan.
Minskning iddaosiga ko‘ra, “Polsha hukumati o‘zininng noqonuniy harakatlarini jahon hamjamiyati oldida oqlash maqsadida jurnalistlarni chaqirib, ularning oldida muhojirlarga suv tarqatgan”.
26-may kuni Belarus Prezidenti Aleksandr Lukashenko endi uning davlati Yevropa Ittifoqining g‘arbiy chegaralarini kesib o‘tmoqchi bo‘lgan migrantlarga to‘sqinlik qilmasligini eʼlon qilgan edi. Bu Ryanair samolyotining Minskda majburan qo‘ndirilgani tufayli g‘arb eʼlon qilgan sanksiyalarga Belarusning javobi bo‘ldi.
Oldinroq Litva Belarusni yuzlab migrantlarni mamlakat hududiga yuborishda ayblagan, Osiyo va Afrika mamlakatlaridan Belarus orqali Litvaga kirib, vataniga qaytishga rozi bo‘lgan noqonuniy muhojirlarga 300 yevro miqdorida bir martalik nafaqa tarqatgan edi.
Sharofat Mahmudova
