Davron Hidoyatov Senat aʼzosi etib saylandi
Toshkent davlat agrar universitetida Toshkent viloyatida bo‘shab qolgan o‘ringa Oliy Majlis Senati aʼzosi saylovini o‘tkazish bo‘yicha qo‘shma majlis bo‘lib o‘tdi.
Majlisda Markaziy saylov komissiyasi raisi Zayniddin Nizomxo‘jayev so‘z olib, nomzodni saylash to‘g‘risida maʼlumot berdi. Senat aʼzoligiga Toshkent viloyati hokimi Davron Hidoyatov nomzodi ilgari surilib, yashirin ovoz berish jarayonlari o‘tkazildi.
Sanoq komissiyasi xulosasiga ko‘ra, qo‘shma majlisda 535 nafar deputat ishtirok etib, ovoz berish jarayonlariga 531 kishi qatnashdi. Shundan 4ta saylov byulleteni haqiqiy emas deb topildi, 9ta byulletendan foydalanilmadi.
Qo‘shma majlisda ovoz berishda ishtirok etgan deputatlarning 518 nafari Davron Hidoyatovni yoqlab ovoz bergani maʼlum qilindi. Shunday qilib, Toshkent viloyati hokimi ko‘pchilik ovoz bilan Senat aʼzosi etib saylandi.
Maʼlumot uchun, joriy yil mart oyi o‘rtalarida Toshkent viloyati hokimi vazifasini bajaruvchi bo‘lib kelgan Davron Hidoyatov Toshkent viloyati hokimi etib tasdiqlangandi.
D. Hidoyatov 1976 yilda Toshkent shahrida tug‘ilgan. 1996-2009 yillarda bank tizimida, 2014 yilgacha avtosanoat tarmog‘ida faoliyat yuritgan. 2014-2020 yillarda Xususiylashtirish va raqobatni rivojlantirish davlat qo‘mitasi raisi, Chilonzor tumani hokimi, Toshkent shahar hokimining birinchi o‘rinbosari lavozimlarida ishlagan.
