“Tokio-2020”: paralimpiya o‘yinlarida ham bayroqdorimiz o‘zgardi
Xabaringiz bor, O‘zbekiston paralimpiya terma jamoasi shu yil 21 avgust kuni Yaponiyaga yetib bordi. Narita aeroportida olingan test natijalariga ko‘ra, ikki kishi — dzyudo bo‘yicha bir nafar sportchi va murabbiyda koronavirus infeksiyasi aniqlandi va ular Tokio shahrida karantinga olindi.
Shuningdek, yengil atletika bo‘yicha terma jamoa aʼzosi va bayroqdori Nurxon Qurbonova samolyotda ularga yaqin masofada bo‘lganligi bois bu sportchiga ham Xalqaro paralimpiya tashkiliy qo‘mitasi hamda Yaponiya hukumati talablariga muvofiq karantin ehtiyot chorasi qo‘llanildi. Shu sababli N.Qurbonova bugun Toshkent vaqti bilan soat 16:00da boshlanadigan ochilish marosimida bayroqdor sifatida ishtirok eta olmaydi.
O‘zbekiston Milliy paralimpiya qo‘mitasi parakanoe bo‘yicha Jahon chempioni Shahnoza Mirzayeva Muhammad Rixsimov bilan birgalikda bayroqdor sifatida ishtirok etishi taklifini maʼqulladi.
Jamshid Amirov
