Krishtianu Ronaldu Portugaliya terma jamoasidagi faoliyatini yakunladi
41 yoshli hujumchi milliy jamoa safida 23 yil davomida kiyib kelgan 7-raqamli futbolkasini keyingi avlodga topshirishini ma’lum qildi.
Krishtianu Ronaldu Portugaliya terma jamoasidagi faoliyatini yakunlaganini e’lon qildi. Futbolchi bu haqda o‘zining Instagram sahifasida ma’lum qildi.
«Milliy jamoamizning 7-raqamli futbolkasini topshirish vaqti keldi. Bu futbolka hech qachon faqat menga tegishli bo‘lmagan. Ammo 23 yil davomida uni kiyish, himoya qilish va dunyoning turli stadionlarida Portugaliya bilan birga olib yurish men uchun katta sharaf va mas’uliyat bo‘ldi.
Bugun uni keyingi avlodga topshirish vaqti keldi. Bu oson qaror bo‘lmadi. Chunki ayrim qarorlar faqat aql bilan emas, yurak bilan ham qabul qilinadi.
2003-yil avgustida boshlangan va hayotimni butunlay o‘zgartirgan yo‘l nihoyasiga yetdi», - deb yozgan Ronaldu.
Futbolchi terma jamoadagi faoliyati davomida faqat gollar, rekordlar va sovrinlarni emas, balki muxlislar bilan bog‘liq xotiralarni ham yodda saqlashini ta’kidladi.
«Men hech qachon uchrashmagan, ammo hayotimning bir qismiga aylangan millionlab portugaliyaliklarni ko‘ryapman. Chunki futbol shunchaki o‘yindan ancha kattaroq. Futbol - bu odamlar», - deya qo‘shimcha qildi hujumchi.
Ronaldu Portugaliya terma jamoasida 2003-yil avgustida debyut qilgan. U milliy jamoa safida jami 234 ta uchrashuvda maydonga tushib, 146 ta gol urdi. Bu erkaklar xalqaro futboli tarixidagi eng yuqori ko‘rsatkich hisoblanadi.
Hujumchi Portugaliya bilan 2016-yilda Yevropa chempionatida, 2019 va 2025-yillarda esa UEFA Millatlar ligasida g‘olib chiqqan. Shuningdek, u olti marta Jahon chempionatida ishtirok etib, ushbu musobaqaning olti xil turnirida gol urgan tarixdagi ilk futbolchiga aylangan.
Shu tariqa, jahon futboli tarixidagi eng sermahsul hujumchilardan biri bo‘lgan Ronalduning Portugaliya terma jamoasidagi 23 yillik faoliyati yakunlandi.
