O‘rtoqlik uchrashuvi: O‘zbekiston Rossiyaga imkoniyatni boy berdi
Mezbonlar ikki to‘p farqi bilan oldinda borayotganiga qaramay, ustunlikni saqlab qola olmadi.
O‘zbekiston milliy terma jamoasi Toshkentda Rossiyaga qarshi o‘tkazilgan o‘rtoqlik uchrashuvida 2:3 hisobida mag‘lub bo‘ldi.
12-noyabr kuni «Paxtakor» stadionida o‘tkazilgan bahsning 4-daqiqasida Viktor Melyoxin to‘pni o‘z darvozasiga kiritib qo‘ydi. Natijada O‘zbekiston terma jamoasi hisobda ustunlikka ega bo‘ldi.
Ikkinchi bo‘lim boshlanishi bilan, 46-daqiqada Behruz Karimov o‘z hisobiga gol yozdirib qo‘ydi. Unga Dostonbek Hamdamov assistentlik qildi. Shu tariqa O‘zbekiston 2:0 hisobida oldinga chiqib oldi.
Biroq Rossiya terma jamoasi o‘yin yakuniga yaqin hisobni o‘zgartirishga muvaffaq bo‘ldi. 70-daqiqada Nikolay Komlichenko Kirill Danilovning uzatmasidan keyin hisobdagi farqni qisqartirdi. Oradan besh daqiqa o‘tib, Komlichenko yana bir bor darvozani ishg‘ol etib, hisobni tenglashtirdi.
79-daqiqada esa Aleksey Miranchuk Danil Krugovoyning uzatmasidan keyin gol urdi va Rossiya terma jamoasiga g‘alaba keltirdi.
