Erdo‘g‘an Suriya masalasida Putin bilan uchrashmoqchi
Turkiya Prezidenti Rajab Toyyib Erdo‘g‘an senyatbr oxirida Vladimir Putin bilan uchrashishni rejalashtirmoqda. Bu haqda “Reuters” xabar berdi.
Maʼlum qilinishicha, uchrashuv Sochida o‘tkaziladi. Suriyadagi vaziyat muhokamalarning asosiy mavzusiga aylanadi. So‘nggi kunlarda ushbu mamlakat shimoli-g‘arbida vaziyat keskinlashmoqda. Idlib va uning atrofida to‘qnashuvlar boshlangan. Halab viloyatida ham notinchlik hukmron. Xususan, Rossiya harbiy-kosmik kuchlari 17 sentyabr kuni ushbu viloyatning Darat-Izza shahriga zarbalar bergan.
2020 yilda har ikki davlat Idlibda o‘t ochishni to‘xtatishga kelishib olgan edi. Hozirda Turkiya va Rossiya bir-birini erishilgan kelishuvlarni buzishda ayblab kelmoqda.
Garchi o‘zaro kelishmovchiliklar bo‘lsa-da, lekin ularni birlashtirib turadigan umumiy manfaatlar ham bor. Masalan, Anqara NATO aʼzosi bo‘lishiga qaramay, Rossiyaning S-400 havo hujumiga qarshi mudofaa tizimini sotib olish bo‘o‘yicha kelishuvga erishgan. Shuningdek, Turkiyaga har yili millionlab rossiyalik turistlar keladi. Qayd etilishicha, davlat rahbarlari bu masalalarni ham muhokama qiladi.
Eslatib o‘tamiz, bundan avval Suriya Prezidenti Bashar Asad Moskvaga eʼlon qilinmagan tashrif bilan kelgani maʼlum qilingandi.
Jahongir Qo‘ziyev
