Qayniuka pochchasidan qasd olish uchun uning akasini pichoqladi
Shu yilning 23-sentyabr kuni Surxondaryo viloyati Uzun tumanidagi oilalardan birida mojaro kelib chiqadi. Kelishmovchilik oqibatida M. rafiqasi X.ni kaltaklaydi.
Ayol qattiq kaltaklangani tufayli tuman tibbiy birlashmasiga yotqiziladi.
Voqeadan xabar topgan X.ning ukasi opasini nega urganini bilish maqsadida soat 15:00 atrofida pochchasi oldiga boradi. Opasi haqida qayg‘urgan uka pochchasiga tegishli bo‘lgan milliy taomlar oshxonasiga borgan vaqti oshxonaning ovqat pishiriladigan qismida u bilan tortishib qoladi. Janjal boshlangan vaqtda pochchasining akasi R. ham o‘sha yerda bo‘lgan. X.ning ukasi o‘zini himoyalash uchun cho‘ntagida olib yurgan oshxona pichog‘i bilan R.ning ko‘krak qismiga jarohat yetkazadi. U zudlik bilan shifoxonaga olib ketilgan.
Holat bo‘yicha tezkor tergov harakatlari olib borilib, 23-sentyabr kuni X.ning ukasiga nisbatan Jinoyat kodeksining 104-moddasi 2-qismi "y”, “e” va “l” bandlari bilan jinoyat ishi qo‘zg‘atilgan.
Eslatib o‘tamiz, bundan avval Samarqandda yer talashgan fuqaro qo‘shnisi tomonidan pichoqlab o‘ldirilgani haqida xabar berilgandi.
Maftuna Rejabboyeva tayyorladi.
