Prezident Farg‘onadagi saylovoldi uchrashuvda jadidlarni eslab o‘tdi
Shavkat Mirziyoyev ayni paytda Farg‘ona viloyatida saylovchilar bilan uchrashuv o‘tkazmoqda.
Prezident uchrashuvda:
“O‘tgan asrda 100 ming yurtdoshimiz qatag‘on qilingan. Ular bilgan, ikkita Renessansni qila olgan xalqning ziyolilarini atay yo‘q qilgan. Biz yurtimizda Uchinchi Renessans poydevorini yaratishga harakat qilyapmiz. Hech shubhasiz, agar mustamlaka tuzumining qatag‘on siyosati bo‘lmaganida, ushbu Renessansni maʼrifatparvar jadid bobolarimiz yaratgan bo‘lar edi”, - dedi.
Shavkat Mirziyoyev Farg‘ona jadidlarining maʼnaviy otasi - Zokirjon Furqat ijodini keng ommalashtirish Qo‘qon shahri markazidagi Furqat bog‘ida shoirning haykalini o‘rnatish bo‘yicha taklif bildirdi.
Shuningdek, Shavkat Mirziyoyev Ashurali Zohiriyni yodga oldi:
“Yurtimizda ilk bor “O‘zbek tili” darsligini yaratgan atoqli olim, jurnalist va tarjimon, jamoat arbobi Ashurali Zohiriy bo‘lganini sizlar albatta yaxshi bilasizlar. Butun umrini el-yurtni, millatimizni maʼrifatli va madaniyatli qilishga bag‘ishlagan, 1937 yili “xalq dushmani” sifatida qatag‘on qurboni bo‘lgan bu betakror insonning xotirasini munosib qadrlash, nomini abadiylashtirish uchun zarur chora-tadbirlarni amalga oshirsak, o‘ylaymanki, tarixiy adolat qaror topadi”.
Bundan avval, Prezident viloyatda kanalizatsiya va issiqlik taʼminoti tizimlari yetarli rivojlanmaganligini aytgandi.
Cho‘lponoy Ahmedova
