Firdavs Abduxalikov: "Kino asarlarimizni bugungi zamon talablari darajasiga ko‘tarishimiz kerak"
Xalqimizning noyob madaniy merosi — turli davrlarda yaratilgan milliy kino fondini asrab-avaylash, ularni keyingi avlodlarga bekamu-ko‘st yetkazish biz zamondoshlar zimmasidagi yuksak burch va vazifadir. Shu bois barcha sharoitga ega O‘zbek milliy kinofondi binosi foydalanishga topshirildi.
Kuni kecha Toshkent xalqaro kinofestivali ochilishi arafasida xalq orasida ”Рanorama”, degan nom bilan tanilgan bino qayta kapital taʼmirlanib, yangicha qiyofa kasb etib respublika “Kinochilar uyi”ga aylantirildi. Bu yerda milliy kino muzeyi ham o‘rin olgan. Maʼlumki, sifatli kino yaratish uchun yaxshi mutaxassislar bilan birga ilg‘or kinotexnologiya va asbob-uskunalar ham kerak. So‘nggi yillarda milliy kinoni yana-da rivojlantirish uchun keng ko‘lamli ishlar olib borilmoqda.
Firdavs Abduxalikov, O‘zbekiston Kinematografiya agentligi bosh direktori:
— O‘zbek kinosi mavqei va obro‘-eʼtiborini qayta tiklash, bu boradagi ishlarni yana-da rivojlantirish — agentlik oldida turgan eng dolzarb vazifalardan biridir. Buning uchun, albatta, kino asarlarimizni bugungi zamon talablari darajasiga ko‘tarishimiz, jahon kino sanoati bilan hamqadam va hamsaf bo‘lshimiz kerak. Bu, o‘z navbatida, dunyoning yetakchi kinotexnologiyalar ishlab chiqaruvchi kompaniyalar bilan hamkorlik qilishimiz, zamonaviy kinotexnologiyalardan samarali foydalanishimizni taqozo etadi.
Ayni shu maqsadda 2019-yildan buyon Daniyaning “Danmon Group” kompaniyasi vakillari bilan muzokaralar olib boryapmiz. Ana shu hamkorlik natijasida “O‘zbekfilm” kinokonserni uchun xorijdan 25 million yevro qiymatidagi yangi zamonaviy texnologiyalarni olib kelyapmiz.
Ushbu zamonaviy, eng so‘nggi rusumdagi texnikalar jahon kinematografiyasi talablariga javob bera olishi bilan ahamiyatlidir. Zamonaviy texnikalardan nafaqat o‘zbek kinoijodkorlari, balki boshqa mamlakatlar kinokampaniyalari ham shartnoma asosida foydalanishlari mumkin. “O‘zbekfilm” kinokonsernini to‘liq qayta jihozlash katta mablag‘ talab qiladi.
Shu bois, ushbu kinotexnologiyalardan unumli foydalanishimiz kerak. Ulardan foydalanish bo‘yicha xorijiy mutaxassislar va kinoijodkorlar ishtirokida mashg‘ulotlar olib boriladi. “O‘zbekfilm” kinokonsernining zamonaviy texnika va texnologiyalar bilan qayta jihozlanishi milliy kinematografiya rivojida muhim o‘rin tutishi, shubhasiz.
Eslatib o‘tamiz, kinofestival bosh homiysi: AGMK, NGMK va “O‘zbekneftgaz”. Hamkor homiylar: “O‘ZBEKTELEKOM”, “O‘zdonmahsulot” AK, “O‘zpromstroybank”ATB, “Ipoteka-bank” ATIB, “Asakabank”AJ, “O‘zbekiston temir yo‘llari”, “Hududgazta‘minot”, “UzAuto Motors”AJ, “O‘zmetkombinat” AJ, “Milliy bank”AJ, “Farg‘onaazot”AJ, “Eriell”, “Bosch” TM, “Easy Booking”.
Munojat Valiyeva
