Birlashgan Arab Amirliklarida Horun ar-Rashidning rafiqasi Zubaydaga tegishli xazinalar topildi
Sharja amirligi arxeologiya idorasining arxeologik missiyasi davomida Abbosiylar sulolasi davriga oid kumush tangalar xazinasini topdi.
Bu haqda "Islam.ru xabar berdi.
Maʼlum qilinishicha, tangalar eski sopoldan yasalgan idishda bo‘lgan. Mutaxassislar aniqlangan tangalar orasida Zubayda Ummul Vohidga (milodiy 762 / 765-831) tegishli kumush dirham bo‘lganini aytgan. U Abbosiylar sulolasidan chiqqan arab malikasi, eng qudratli xalifalardan biri Horun ar-Rashidning suyukli rafiqasi bo‘lib, o‘g‘li xalifa Muhammad Al Amin davrida malika bo‘lgan.
Zubayda o‘sha davrning eng badavlat va eng nufuzli ayollaridan biri sanalgan. Uning boyligi haqida ko‘plab afsonalar tarqalgan. Jumladan, ulardan birida Zubayda har xil tadbirlar, xayr-ehson va kambag‘allarga pul tarqatish uchun 37 million dirhamgacha pul sarflagani keltirib o‘tiladi.
Topilgan tangalarda o‘sha davrning beshta xalifasi Abu Jafar al-Mansur, Muhammad al-Mahdi, Horun ar-Rashid, Muhammad Al Amin va Abu Jafar Abdulloh Al Maʼamun tasvirlanganini maʼlum qilgan.
Qazish ishlari boshlig‘i, doktor Saboh Abud Josimning so‘zlariga ko‘ra, topilma bu mintaqada Abbosiylar sulolasining erta paydo bo‘lishi haqidagi taxminlarni tasdiqlaydi. Shuningdek, u tangalar solingan ko‘za Abbosiylar davriga xos uslubda yasalganini ham qayd etgan. Mutaxassis Abbosiylar sulolasi hukmronligi davrida hozirgi Sharja viloyati butun Fors ko‘rfazi uchun muhim savdo markazi bo‘lganini aytgan.
Avvalroq,Toshkent xalqaro aeroportida xorijga ketayotgan shaxsdan 290 dona turli yillarda zarb etilgan qadimiy tangalar aniqlangani haqida xabar bergan edik.
Munojat Valiyeva
