Og‘ir atletika bo‘yicha jahon chempionati bronza medal bilan boshlandi
Xabaringiz bor, Saudiya Arabistonining Jidda shahrida og‘ir atletika bo‘yicha o‘smirlar o‘rtasidagi jahon chempionatiga start berildi.
Ushbu bahslarda O‘zbekiston terma jamoasi o‘zining ilk medalini qo‘lga kiritdi. Unda hamyurtimiz Husinboy Matrasulov bronza medaliga sazovor bo‘ldi.
61 kg vazn toifasida bahs olib borgan Matrasulov dast ko‘tarishda 119 kg natija ko‘rsatib, mazkur yo‘nalish bo‘yicha uchinchi natijani qayd etdi. Qolaversa, siltab ko‘tarishda 133 kg, ikki kurash bo‘yicha esa 252 kg ko‘rsatkich bilan musobaqani yakunladi.
Afsuski, keyingi ikki dastur bo‘yicha qayd etilgan natijalar sovrinli o‘rinlar uchun biroz kamlik qildi.
Avvalroq Tokio-2020 olimpiada musobaqalarida og‘ir atletika bo‘yicha o‘zbekistonlik Muattar Nabiyeva rekord natija qayd etgani haqida xabar berilgandi.
Cho‘lponoy Ahmedova
